- २३ श्रावण २०८३, शनिबार / Aug 8, 2026
बेलायतका विद्यालयमा मोबाइल फोन प्रयोगमा कडाइ
निरीक्षणका क्रममा अनिवार्य रूपमा नियम पालनाको जाँच
‘फोन निषेधित क्षेत्र’ नीति लागू
बालबालिकाको मानसिक स्वास्थ्य र शिक्षा सुरक्षामा ध्यान
देशव्यापी परामर्श प्रक्रिया सुरु अनुमति बिना मोबाइल प्रयोग गर्ने विद्यार्थीको प्रतिशत मध्यम र माथिल्लो तहमा क्रमशः ५८% र ६५%
बेलायत, माघ ७ । बेलायत सरकारले विद्यालयमा मोबाइल फोनको प्रयोगमाथि थप कडाइ गर्ने निर्णय गरेको छ। अब विद्यालय निरीक्षण निकायलाई हरेक विद्यालय निरीक्षणका क्रममा मोबाइल फोन प्रतिबन्ध प्रभावकारी रूपमा लागू भएको छ कि छैन भन्ने अनिवार्य रूपमा जाँच गर्न निर्देशन दिइएको छ।
विद्यालयहरूलाई ‘पूर्वनिर्धारित रूपमा फोन निषेध’ क्षेत्र बनाउने नीति लागू गरिने पनि सरकारले जनाएको छ। बालबालिकाको सामाजिक सञ्जाल र मोबाइल फोन प्रयोगबारे देशव्यापी परामर्श प्रक्रिया पनि सुरु गरिएको छ।
अत्यधिक स्क्रिन समयले बालबालिकाको मानसिक स्वास्थ्य, शैक्षिक प्रदर्शन र सामाजिक विकासमा नकारात्मक असर पारिरहेको भन्दै सरकारले डिजिटल प्रयोग नियमनतर्फ कडा कदम चालेको हो। यो कदमले बालबालिकाका लागि सुरक्षित र सन्तुलित डिजिटल वातावरण निर्माण गर्ने नीतिमा नयाँ चरणको सुरुवात भएको सङ्केत गर्छ।
अभिभावक, शिक्षक, विद्यालय प्रशासन तथा सांसदहरूले सामाजिक सञ्जाल र स्मार्टफोनको बढ्दो प्रभाव नियन्त्रण गर्न दबाब बढाएका थिए। सरकारले शुरू गरेको परामर्शमार्फत अभिभावक, बालबालिका, शिक्षाविद् तथा नागरिक समाजका प्रतिनिधिबाट सुझाव संकलन गरिनेछ। यसले बालबालिकाले प्रविधिसँग स्वस्थ र जिम्मेवार सम्बन्ध विकास गर्न सक्ने उपायहरू पहिचान गर्न सहयोग गर्नेछ।
सरकारी तथ्याङ्कअनुसार विद्यमान नियमहरू हुँदाहुँदै पनि कक्षाकोठामा मोबाइल फोनको प्रयोग भइरहेको देखिएको छ। माध्यमिक तहका ५८ प्रतिशत विद्यार्थीले केही कक्षामा अनुमति बिना मोबाइल प्रयोग हुने बताएका छन्, जबकि माथिल्लो कक्षाका विद्यार्थीहरूमा यो प्रतिशत ६५ सम्म पुगेको छ।
