- २० आश्विन २०८३, मंगलवार / Oct 6, 2026
काठमाडौं । कांग्रेस र एमाले मिलेर सरकार बनाउने सहमति भएपछि मन्त्रालय भागबण्डामा टुंगिएको नेताहरुले बताएका छन् । प्रधानमन्त्री प्रचण्डले भोलि सदनमा विश्वासको मत लिँदा नपाएपछि नयाँ सरकार गठनको प्रक्रिया अघि बढ्ने उनीहरुको तर्क छ । पहिलो चरणमा एमाले अध्यक्ष ओली प्रधानमन्त्री बन्दैछन् । एमालेले सरकारको नेतृत्व गरेपछि कांग्रेसले ११ र एमालेले १० मन्त्रालय पाउने सहमति भएको छ ।
मन्त्रायल भागबण्डामा दुई दलबीच धेरै विवाद नरहेको काँग्रेस सभापति देउवाले बताएका छन् । ‘साना दल सबै सरकारमा जान तयार देखिएका छन् । यो डेढ वर्षमा जनमोर्चा र नेमकिपाबाहेक सबै सरकारमा गएका छन् । त्यसैले दुई दलले लिने मन्त्रालय निश्चित भएको छ ।’ गृह र परराष्ट्र कांग्रेसले र अर्थ र सञ्चार एमालेले लिने सहमति भइसकेको दाबी छ । अरु मन्त्रालय टुंग्याउन रमेश लेखक र शंकर पोखरेल बसेर मन्त्रालयको टुंग्याउने तयारी छ ।
सबैलाई मान्य हुनेगरी मन्त्रालयको बाँडफाँट हुने प्रवक्ता डा. प्रकाशशरण महतले बताए । सरकारमा उपप्रधानमन्त्री राख्ने कि नराख्ने भन्ने विषयमा छलफल भइरहेको छ । तर, एमालेका अध्यक्ष ओलीले मन्त्रालयको बाँडफाँट भइ नसकेको दाबी गरेका छन् ।
