अदालत जाँदै उपेन्द्र यादव

काठमाडौं । पार्टी विभाजनविरुद्ध उपेन्द्र यादव नेतृत्वको जनता समाजवादी पार्टी नेपाल आज अदालत जाने भएको छ । यसबारे औपचारिक निर्णय गर्न आज केन्द्रीय कार्यकारिणी बैठक बोलाइएको हो । पार्टी केन्द्रीय कार्यालय बालकुमारी ललितपुरमा बस्ने बैठकले निर्णय गर्ने प्रवक्ता मनिष सुमनले बताए ।

अशोक राईको नेतृत्वमा ७ सांसद र ३० केन्द्रीय सदस्यको माग अनुसार नयाँ दल दर्ता गराएको विषयमा अदालत जाने तयारी गरेको यादवले बताए । पार्टी विभाजनको विषयमा आज पत्रकार सम्मेलन गरेर जानकारी गराउन लागेको प्रवक्ता सुमनले जानकारी दिए।

बिहान साढे ११ बजे पार्टीको केन्द्रीय कार्यालय बालकुमारीमा पत्रकार सम्मेलन राखिएको छ । दल विभाजन सम्बन्धी कानूननै नभएको बेलामा निर्वाचन आयोगले पार्टी विभाजनलाई मान्यता दिएकोप्रति जसपाले असन्तुष्टि जनाएको छ।

यादव अमेरिका भ्रमणमा भएको बेलामा राईको नेतृत्वमा आइतबार निवेदन दिए लगत्तै आयोगले सोमबार नयाँ दलको मान्यता दिएको थियो । हिजोको बैठकले पार्टी विभाजनबारे कानूनी उपचार खोज्ने निष्कर्ष निकालेको थियो ।