आदिवासीको लडाइँमा २० जनाको मृत्यु

सिड्नी । पपुवा न्यु गिनीको सुनखानी नजिकै ठूलो जनजातीय लडाइँ भएको छ । त्यसबाट बच्न महिला, केटी, वृद्ध र जवान केटाहरूको भागदौड हुँदा कम्तीमा २० जनाको मृत्यु भएको सञ्चारमाध्यमले जनाएका छन् ।

मुलुकको सबैभन्दा ठूलो सुन भण्डारमध्येको एक एन्गा प्रान्तको पोर्गेरा उपत्यकामा अवैध दुई खानी समूह एकआपसमा लड्दा गत साता एउटा समूहले अर्को समूहका दुई जनालाई मारेको थियो ।

दुई स्थानीय खानी कामदारसहित करिब २० व्यक्तिको मृत्यु भएको स्थानीय पत्रिका पोस्ट–कुरियरले जनाएको छ । प्रत्येक दिन मृतकको सङ्ख्या लगातार बढ्दै गएको छ । पोर्गेरामा पाँच हजारभन्दा बढी मानिसको सामूहिक पलायन भएको बताइएको छ ।