उच्च सतर्कता अपनाउन महाशाखाको आग्रह

काठमाण्डौ । वर्षातको मौसममा हुनसक्ने दुर्घटनाबाट बच्च बाढी पूर्वानुमान महाशाखाले आग्रह गरेको छ । सुनसरी, मोरङ र सप्तरीमा ठूलो वर्षा भइरहेकाले सजग रहन बाढी पूर्वानुमान महाशाखाले आग्रह गरेको हो । मनसुनी प्रणाली पूर्वी क्षेत्रमा बढी सक्रिय भएकाले त्यहाँका केही ठाउँमा आरीघोप्टे पानी परेको जनाएको छ ।

सुनसरीको इटहरी, मोरङको लेटाङ तथा हरैचा आसपास अति ठूलो पानी परेकाले बाढी र डुबानको जोखिम बढेको बाढी पूर्वानुमान महाशाखाले जनाएको छ ।
पछिल्लो तीन घण्टामा मात्रै यी जिल्लामा एक सय मिलिलिटरभन्दा धेरै पानी परेको छ । सामान्यतया २४ घण्टामा यति धेरै पानी पर्ने हुन्छ ।

बिहान ११ बजेसम्म नै यी क्षेत्रमा उच्च सतर्कता अपनाउन महाशाखाले आग्रह गरेको छ । सप्तरीको बर्माजियामा पनि अति ठूलो वर्षा भएको छ । बाढी पहिरोको जोखिम रहेकाले त्यहाँ पनि सतर्कता अपनाउन मौसमविद्ले जनाएका छन् । त्यहाँका बुढीखोला, खेसलिया, सुनसरी खोला, लोहन्द्रालगायत साना खोलामा आकस्मिक बाढीका साथै होचा ठाउँमा डुबानको उच्च जोखिम छ ।