‘ए’ डिभिजन लिगः आज दुई खेलमा भिडन्त हुँदै

काठमाडौं । सहिद स्मारक ‘ए’ डिभिजन लिग फुटबलको पाँचौं चरणअन्तर्गत आज दुई खेल हुँदैछन् । दशरथ रंगशालामा हुने पहिलो खेलमा सातदोबाटो युथ क्लब र त्रिभुवन आर्मी क्लबबीच भिडन्त हुदैछ ।

सातदोबाटो र आर्मीबीचको खेल दिउँसो १ बजे सुरु हुनेछ । सातदोबाटो तेस्रो जितको खोजीमा छ भने आर्मी हराएर शीर्ष स्थानमा उक्लने योजनामा छ ।

सातदोबाटो ४ खेलमा ७ अंक जोडेर लिगको पाँचौं स्थानमा रहेको छ भने आर्मी ४ खेलमा ८ अंक जोडेर तेस्रो स्थानमा रहेको छ । दोस्रो खेलमा संकटा क्लबले साविक विजेता मछिन्द्र क्लबसँग दिउँसो पौने ५ बजे प्रतिस्पर्धा गर्दैछ ।

दुवै टिम तीन अंक जोड्ने योजनामा छन् । ४ खेलबाट संकटा ८ अंक जोडेर चौंथो स्थानमा रहेको छ भने मछिन्द्र १० अंक जोडेर शीर्ष स्थानमा छ ।