- ११ भाद्र २०८३, बिहीबार / Aug 27, 2026
काठमाडौं । गैरआवासीय नेपाली संघको पराजित समूहले संघको केन्द्रीय कार्यालयभित्र पसेर फोटोसेसन गरेको छ । विजयी टिम कार्यालय छोडेर दशैं मनाउन हिँडेको मौकामा पराजित टिम भित्रिएको हो । बालुवाटारमा एउटा भवनको फ्ल्याटमा एनआरएनको हेडअफिस रहेको छ ।
अरु फ्ल्याट अरुले नै भाडामा लिएकाले मुल गेट खुल्ला नै हुने गरेको छ । पराजित टिमले बनाएको कार्यसमितिका अध्यक्ष आरके शर्मासहितको टीम मुल गेटबाट सरासर भित्र छिरेको थियो । पराजित समूहले गठन गरेको कार्यसमितिले प्रधानमन्त्रीलाई पनि भेटेका थिए ।
एनआरएनए ११ औं महाधिवेशनमा भएको चुनावमा एमाले निकट डा बद्री केसी विजयी भएका थिए । माओवादीनिकट आरके शर्मा प्रमुख प्रतिस्पर्धी हुँदा कांग्रेसनिकट डा महेश श्रेष्ठ तेस्रो भएका थिए । पराजयपछि शर्मा र श्रेष्ठले गठजोड गरेका छन् ।
उनीहरुले चुनावको मतपरिणाम नमान्ने घोषणा गर्दै समानान्तर कार्यसमिति बनाएका हुन् । सरकारले अहिलेसम्म चुनाव जितेर बनेको कार्यसमितिलाई मान्यता दिएको छैन । केसीको टीमले प्रधानमन्त्री र परराष्ट्रमन्त्रीलाई भेट्न प्रयास गर्दा उनीहरु अनिच्छुक देखिएका छन् ।
परराष्ट्रमन्त्रीले भने केही दिनमा भेट्ने सन्देश पठाएको स्रोतको दावी छ । यद्यपि, पराजित समूहको कार्यसमितिलाई भने अस्तिकै दिन परराष्ट्रमन्त्री एनपी साउद र अर्थमन्त्री डा प्रकाशशरण महतले भेट दिएका थिए । त्यसपछि हिजो प्रधानमन्त्रीले समेत उनीहरुलाई भेटेका हुन् ।
