- १६ जेष्ठ २०८३, शनिबार / May 30, 2026
काठमाडौं । नेपाली काँग्रेसको १४ औँ महाधिवेशनमा नयाँ नेतृत्व चैनका लागि अहिले मतदान जारी छ । यो समाचार तयार पार्दा सम्म एक हजार ४०१ मत खसेको छ ।मध्यान्ह १२ बजेदेखि मतदान सुरु भएको महाधिवेशन मिडिया सेन्टरका संयोजक डां सुरेश आचार्यले बताए ।
१३२ पदका लागि ४८७ उम्मेदवार चुनावी प्रतिस्पर्धामा उत्रिएका छन् । मतदान गर्नका लागि राष्ट्रिय सभा गृहमा एक स्थान र भृकुटीमण्डपका दुई स्थानमा व्यवस्था गरिएको छ । हाल राष्ट्रिय सभा गृहमा ५१३ र भृकुटीमण्डपका दुई स्थान (प्रदर्शनी हल र प्राङ्गण)मा ९५२ मत खसेको छ ।
निर्वाचन समितिले भृकुटीमण्डपका दुई स्थानमा दुई हजार १०० र एक हजार ३०० तथा राष्ट्रिसभागृहमा एक हजार ३०० मतदाताका लागि मतदान गर्ने प्रबन्ध मिलाइएको काँग्रेस केन्द्रीय निर्वाचन समितिले जनाएको छ ।
काँग्रेसका नेता कूलबहादुर गुरुङले पहिलो मत खसाले पछि धमाधम मतखसाल्न सुरु भएको हो । एक जना प्रतिनिधिलाई मतदान गर्न करिब एक घण्टा समय लाग्ने जनाइएको छ ।
१६७ सदस्यीय कार्यसमितिमध्ये १३४ पदमा निर्वाचन हुने र बाँकी ३३ सदस्य केन्द्रीय सभापतिबाट मनोनीत हुने कांग्रेस विधानमा व्यवस्था रहेको छ । महाधिवेशनमा प्रतिनिधिको सङ्ख्या ४ हजार ७ सय ४३ रहेको छ ।
