घाँस काट्न हिडेका सात बालिका सम्पर्कविहीन

बर्दिबास । महोत्तरीको भंगहा–८ धर्मपुरका पाँच बालिकासहित सात जना सम्पर्कविहीन बनेका छन् ।

मंगलबार घाँस काट्न गएका उनीहरू अबेर साँझसम्म घर नफर्किएपछि परिवार अप्ठ्यारोमा परेको भंगहाका मेयर सञ्जीवकुमार साहले बताए । ११ वर्षीया अर्चना पासमान, १२ वर्षीया सीमा र रञ्जना पासमान, १३ वर्षीया ज्योति र रिया पासमान, १७ वर्षीया नगिना पासमान र २० वर्षीया अस्मिता पासमान बेखवर छन् ।

मंगलबार दिउँसो २ गाउँभन्दा पूर्वको अजगेवाको चौरीमा घाँस काट्न गएका थिए । उनीहरूलाई कसैले बन्धक बनाएको हुन सक्ने आशंका गाउँलेले गरेका छन् । बालिकाहरूको खोजी गर्न प्रहरी परिचालन गरिएको महोत्तरीका एसपी दिनेश आचार्यले बताए । लोहारपट्टी प्रहरी चौकी र भंगहा प्रहरी चौकीका प्रहरी टोली परिचालित भएका छन्। भंगहा सशस्त्र बेस क्याप पनि खोजीमा खटिएका छन् ।