चामल नभएर दुर्गमका गोदाम रित्ता, सरकारी नारा छ 'सुपथ मुल्य पसल'

धनगढी । चाडपर्वलाई लक्षित गरी नेपाल खाद्य तथा व्यापार कम्पनी लिमिटेडले सुगम क्षेत्रमा तामझामका साथ सुपथ मूल्य पसल सञ्चालनमा ल्याएको छ । तर देशका दुरदराजका अधिकांश खाद्य गोदाम रित्ता भएका छन् । सुपथ मुल्य पसल नारामा सिमित भएकाे दुर्गमका स्थानीय बताउँछन् । जिल्लामा सुपथ पसल त के चामल समेत नभएर गोदाममा ताल्चा झुन्डिएका छन् ।

खाद्यान्न संकट भइरहने बाजुरामा कम्पनीका गोदाम रित्ता भएका छन् । अत्यधिक माग हुने कोल्टीस्थित खाद्य डिपोले असोज ८ देखि खाद्यान्न सकिएको सूचना टाँस गरेर ताल्चा झुण्ड्याएको छ । कोल्टी क्षेत्रकै कवाडी र मुक्तिकोट बिक्री केन्द्रको अवस्था झन दयनिय छ ।

सदरमुकाम मार्तडीमा त बेजोगको स्थिति छ । गोदाममा खाद्यान्न छैन बाहिर भने ‘सुपथ मूल्य पसल’ भनेर बडेमानको ब्यानर झुन्ड्याइएको छ । कोल्टी डिपोको गोदाम रित्तिँदा सर्वसाधारण उपभोक्ता मारमा परेका छन् ।

गोदाममा भएका बेला डिपोले प्रतिकिलो ५६ रुपैयाँमा बिक्री गर्ने गुणस्तरकै चामल अहिले बजारमा ७० रुपैयाँ प्रतिकिलो किन्नुपरेको छ । प्रदेश कार्यालयमा स्थानीयले पटक पटक गुहार्दा आश्वासन आए पनि चामल भने आउन नसकेको गाउँले बताउँछन् । स्थानियको गुनासोमा कोल्टी डिपो प्रमुख भीमबहादुर बुढा भन्छन्, ‘हामीलाई पनि तनाव छ, चाडबाडका मुखमा गोदाममा ताल्चा झुन्ड्याउनुपरेको छ ।’

नेपाल खाद्य तथा व्यापार कम्पनी प्रदेश कार्यालय धनगढीले भने ढुवानी सम्झौता गर्न ढिलाइ भएर समस्या भएको बताएको छ । बाजुरामा गत आर्थिक वर्ष ०७९–०८० मा मार्तडीमा ९ हजार, कोल्टीमा ८ हजार, कवाडीमा ३ हजार र मुक्तिकोटमा ५ सय क्विन्टल मोटा चामल बिक्री भएको थियो ।