- ६ असार २०८३, शनिबार / Jun 20, 2026
चितवन । चितवन राष्ट्रिय निकुञ्जले असार १६ गतेदेखि निकुञ्जमा हुँदै आएका व्यावसायिक जङ्गल ड्राइभ (सफारी)मा रोक लगाएको छ । निकुञ्जभित्रका कच्ची वनपथ बिग्रिने, जङ्गलमा भएका स–साना खोला खोल्सीमा भल बाढी आउने, रुख लडेर बाटो अवरुद्ध हुने र मानवीय क्षतिसमेत हुनसक्ने भन्दै निकुञ्जले जङ्गल सफारीमा रोक लगाएको हो ।
डुङ्गा सञ्चालनजस्ता पर्यटकीय गतिविधिमासमेत रोक लगाइएको छ । अर्को सूचना जारी नहुँदासम्मका लागि सफारीमा रोक लगाइएको निकुञ्ज प्रशासनले जनाएको छ । सफारीका लागि अनुमति लिएको ६५ जिपले सौराहाबाट ३२, कसराबाट १६ र मेघौलीबाट नौ रहेका छन् ।
यस्तै उजौलीबाट दुई, अमलटारीबाट पाँच र माडीबाट एउटा जिपले निकुञ्जभित्र सफारीका लागि अनुमति लिएका छन् । डुङ्गा सञ्चालनका लागि तीन घाटमा ठेक्का लागेको छ । राप्ती नदीमा रहेका छ घाटमध्ये तीन घाटबाट मात्र डुङ्गा सफारी हुँदै आएको थियो । वर्षात् सुरु भएसँगै निकुञ्ज र नदीमा हुने पर्यटकीय गतिविधिमा रोक लगाइएको हो ।
मध्यवर्ती सामुदायिक वनतर्फ हुने गतिविधिमा भने निर्णय हुन बाँकी छ । यस क्षेत्रका सामुदायिक वनमा हात्ती सफारी र डुङ्गा सफारी हुँदै आएको छ । तर निकुञ्जमा हालसम्मकै बढी पर्यटक यस वर्ष छिरेका छन् ।
