जजिराको विमान चरा सँग ठोक्कियो, इन्जिनभित्रै छिरेको शंकापछि लुम्बिनीमै ‘होल्ड’

रुपन्देही ।जजिरा एयरलायन्सको विमान चरासँग ठोक्किएपछि गौतमबुद्ध अन्तर्राष्ट्रिय विमानस्थल भैरहवामा अवतरण गरेको छ ।१२१ यात्रु लिएर सोमबार बिहान २ बजे भैरहवामा अवतरण गर्ने क्रममा जजीरा एयरलाईन्स चरासंग ठोक्किएको थियो ।

साढे २ बजे ३८ जना यात्रु लिएर फर्कने समय भएपनि सावधानी अपनाउँदै राति नै फिर्ता जानुपर्ने जजीराले अहिलेसम्म उडान भरेको छैन । जहाज विमानस्थलमै छ ।

बिहान आएको विमान चरासँग ठोक्किएपछि फिर्ता जान नसकेको विमानस्थलका प्रवक्ता श्याम किशोर साहले जानकारी दिए । उनले भने, ‘हवाईजहाजको बाहिरी भागमा रगत देखिन्छ, अवतरणको क्रममा चरासंग ठोक्किएको पाइलटले आशंका गरेका छन् ।

रनवेमा चरा देखिएन त्यसैले चरा कतै ईन्जिनमा त गएन ? भनेर जहाज होल्ड भएको छ, इन्जिनियरले चेक गरेपछि मात्रै उडान गर्ने जानकारी आएको छ ।’

जहाज चरासंग ठोकिए पनि सबै यात्रु सकुशल छन् । जेठ २ गतेदेखि जजीरा एयरलाइन्सले सोमबार, बुधबार र शुक्रबार उडान गरिरहेको छ ।