जिप दुर्घटनामा ५ जनाको मृत्यु

गोरखा । शहीद लखन गाउँपालिका–५ ताक्लुङबाट शहीद लखन ३ चिलिङकोटस्थित बेहुलीको घरमा गएर टिकाटालो गरेर फर्किंदै गरेको जिप गएराति दुर्घटना भएको छ । जिप दुर्घटनामा पाँच जनाको मृत्यु भएको छ ।

बेहुला पक्षका तीनवटा गाडी चढेर टीकाटालो गर्न गएका मध्ये एउटा गाडी दुर्घटना भएको हो । प्रमुख जिल्ला अधिकारी दिनेशसागर भुसालले भने, ‘आज बिहान ५ बजे मैले अपडेट लिँदा प्रहरीले पाँच जनाको शव भेटिएको छ भनेर भनेको छ ।

मृतकको पहिचान खुल्न बाँकी छ ।’ उक्त जिप सडकबाट करिब २ सय मिटर तल खसेको हो । दुर्घटनास्थलमा खोज तथा उद्धार कार्यमा नेपाल प्रहरी, सशस्त्र प्रहरी र विपद व्यवस्थापन समितिको टोली खटिएको जिल्ला प्रहरी कार्यालय गोरखाले जनाएको छ ।

कच्ची बाटो, भिरालो स्थान र रातभर पानी परेकाले उद्धारमा कठिनाइ भएको प्रहरीको भनाइ छ ।