- २० आश्विन २०८३, मंगलवार / Oct 6, 2026
काठमाडौँ। नेपालमा सात हजार पाँच सय टन रासायनिक मल भित्रिएको छ । नेपाल र भारत सरकारबीच भएको सम्झौता (जीटुजी)अनुसारको सात हजार पाँच सय टन रासायनिक मल भित्रिएको हो । नेपाललाई वार्षिक कम्तीमा एक लाख मेट्रिक टन युरिया तथा ५० हजार टन डीएपी मल उपलब्ध गराउने गरी गत वर्ष फागुन दोस्रो साता भारत र नेपाल सरकार–सरकार बीच (जीटुजी) समझदारीपत्रमा हस्ताक्षर भएको थियो ।
जीटुजीबाहेक थप ग्लोबल टेन्डरबाट ५९ हजार टन मल आयात गर्न लागिएको जनाएको छ । १५ हजार टन मल मौज्दात रहेको र नियमित रूपमा आयात भइरहेकाले हिउँदेबालीका लागि मल अभाव नहुने जनाइएको छ । पहिलो चरणमा ३० हजार टनमध्येको मङ्गलबारसम्म सात हजार पाँच टन युरिया भित्रिएको कृषि सामग्री कम्पनी लिमिटेडले जनाएको छ । जीटुजीमार्फत पहिलो वर्षमा एक लाख ५० हजार टन मल ल्याउने समझदारी भएकोमा पहिलो चरणमा ३० हजार टन ल्याउन लागिएको कम्पनीले जनाएको छ ।
मङ्गलबारसम्म तीन –याकमा सात हजार पाँच सय टन युुरिया आयात भइसकेको र एक –याकमा दुई हजार पाँच सय टन मल हुने कम्पनीले जनाएको छ । माघ दोस्रो सातासम्म जीटुजीमार्फतको ३० हजार टन मल पनि आइसक्ने कम्पनीले जनाएको छ । कम्पनीले ग्लोबल टेन्डर गरेर चालू आवको पुस मसान्तसम्म एक लाख एक हजार सात सय टन मल आयात गरिसकेको छ ।
जीटुजीमार्फत दोस्रो वर्षमा एक लाख ७० हजार मेट्रिक टन, तेस्रो वर्षमा एक लाख ९५ हजार मेट्रिक टन, चौथो तथा पाँचौँ वर्षमा दुई लाख १० हजार मेट्रिक टन रासायनिक मल उपलब्ध गराउने सम्झौता भएको थियो । कृषि तथा पशुपन्छी विकास मन्त्रालयले जीटुजीको मल खरिद गर्न पहिलो चरणमा तीन अर्ब २६ करोड रुपियाँ पठाएको जनाएको छ । पुरानै मल मौज्दात रहेको र जीटुजीको मल सबै कार्यलयमा वितरण गर्न नपुग्ने भएकाले आयात भएको मल वितरण नगरिएको जनाइएको छ ।
