तेल ट्यांकरमा आगलागी, एकको मृत्यु

बारा । तेल ट्याङ्करमा आगलागी हुँदा एक जनाको मृत्यु भएको छ । जीतपुर सिमरा उपमहानगरपालिका–२१ अमलेखगञ्ज बस्ने ३० वर्षीय लक्ष्मण श्रेष्ठको मृत्यु भएको प्रहरीले जनाएको छ ।

अमलेखगञ्जस्थित आयल निगम भित्र ना.४ ख २६५६ नं. को पेट्रोल ट्यांकरमा आगलागी भएको हो । पेट्रोल अनलोड गर्न पार्किङ गरी राखेको अवस्थामा ब्याट्रीको तार सर्ट भइ ट्यांकरको क्याबिनमा आगलागी हुँदा सहचालक श्रेष्ठ घाइते भएका थिए ।

शरीर जलेर गम्भीर घाइते भएका उनलाई अल्पाइन अस्पतालमा लगिएको थियो । थप उपचारका लागि काठमाडौं वर्न अस्पताल लगिएको थियो ।

शुक्रबार अस्पतालले उनको मृत्यु भएको जानकारी दिएको जिल्ला प्रहरी कार्यालय बाराका प्रवक्ता प्रहरी नायब उपरीक्षक राजेश थापाले बताए ।