ध्वजासहित फागु पूर्णिमाको चीर ठड्याइयो

काठमाडौं । काठमाडौंको बसन्तुपुरमा फागु पूर्णिमाको आगमनको संकेत स्वरुप चीर ठह्याइएको छ । बसन्तपुरमा शुभ साइतमा मानन्धर समुदायले रंगीचंगी ध्वजासहितको तीन तले चीर ठड्याएका हुन् । उनीहरुले हनुमानढोका दरबारको गद्दी बैठकको दक्षिणतर्फ विहिबार बिहान ७ बजेको शुभ साइतमा चीर ठड्याइसकेपछि गुर्जुको पल्टनबाट हर्ष बढाइ समेत गरेका थिए ।

बिहिबारै पशुपतिनाथ, हनुमान ढोका दरबारको सुन्दरीचोक, ललितपुरको पाटन दरबार क्षेत्रको कृष्णमन्दिर प्रांगणमा पनि रंगीचंगी कपडा झुन्ड्याएर होली सुरु भएको जनाउ दिइने जनाइएको छ । होली पर्वको मुख्य दिन चैत ३ र ४ गते परेको छ । ३ गते पहाडी तथा हिमाली भेगमा र ४ गते तराईमा होली मनाईदैछ । चीर ठड्याएपछि देशभर फागु अर्थात् होली पर्व सुरु भएको मानिन्छ । बिहिबार ठड्याइएको चीर पूर्णिमाको रातमा टुँडिखेल पुर्‍याई दाह गरेपछि होली समाप्त हुने प्रचलन रहेको छ ।