- २ श्रावण २०८३, शनिबार / Jul 18, 2026
काठमाण्डौ । सोमबारदेखि पूर्णरुपमा मोबाइल डिभाइस म्यानेजमेन्ट सिस्टम (एमडीएमएस) सञ्चालनमा आएको छ । व्यक्तिगत प्रयोजनका लागि विदेशबाट ल्याइ भन्सार कार्यालयमा जाँच पास भएका मोबाइल सेटहरू एमडीएमएस प्रणालीमा स्वतः दर्ता हुने र नेपालमा मोबाइल सेटहरूको प्रयोग र आयातलाई व्यवस्थित गर्न एमडीएमएस पूर्ण रुपमा लागू गर्न लागिएको नेपाल दूरसञ्चार प्राधिकरणले जनाएको छ ।
नेपालभित्र मोबाइल खरिद गर्दा ती मोबाइल सेट नेपाल दूरसञ्चार प्राधिकरणको एमडीएमएस प्रणालीमा दर्ता भए र नभएको यकिन गरी मात्र खरिद गर्न पनि समेत प्राधिकरणले अनुरोध गरेको छ । वैदेशिक रोजगारीमा ६ महिनासम्म काम गरेर फर्किएका नेपालीले मात्रै दुई वटा मोबाइल फोन ल्याउन पाउने व्यवस्था गरिएको छ । अध्ययन तथा अन्य प्रयोजनका लागि विदेशिएका नेपालीले एक थान मात्रै फोन ल्याउन पाउने व्यवस्था गरिएको छ ।
के हो एमडीएमएस भनेको ?
एमडीएमएस भनेको नेपाल दूरसञ्चार प्राधिकरणले मोबाइलको आयात तथा प्रयोगकर्तालाई व्यवस्थापन गर्न लागू भएको प्रणाली हो । यसले अवैध रुपमा भित्रिने मोबाइल प्रतिबन्ध गर्न सक्ने छ ।
कसरी दर्ता हुन्छ ?
कुनै पनि मानिसले व्यक्तिगत प्रयोजनका लागि विदेशबाट ल्याइएका मोबाइल सेटहरू सम्बन्धित व्यक्ति स्वंयले राहदानी र नागरिकता वा बोर्डिङ पास कागजात प्रणालीमा प्रविष्ट गरी दर्ता गर्न सक्ने व्यवस्था गरिएको छ ।
