- २७ श्रावण २०८३, बुधबार / Aug 12, 2026
दोलखा । दोलखाको बिगु गाउँपालिका–१ लामाबगरमा थप चार किलो सुन बरामद भएको छ । नेपाल प्रहरी र सशस्त्र प्रहरीको संयुक्त टोलीले ढुङमामुनि लुकाइराखेको यो सुन बरामद गरेको जिल्ला प्रहरी कार्यालयले जनाएको छ ।
प्रहरीले यसअघि जामुनेको होटेलबाट तीन किलो र चार किलो सुन सहित ५५ वर्षीय नुर्वु छिरिङ शेर्पा र श्रीमती ३० वर्षीया सुनमाला तामाङ,२८ वर्षीय केशर तामाङ, १८ वर्षीय पेम्बा तामाङ र लामाबगरको गोंगरका २० वर्षीय माधव मगरलाई पक्राउ गरेको थियो ।
चीनबाट अवैध रूपमा ल्याएको सुन लुकाएर राखेको सूचनाको आधारमा प्रहरीले छापा मारेर उनीहरूलाई पक्राउ गरेको हो । तीन पटकमा ११ किलो सुन बरामद भएको छ । अरू व्यक्तिहरू फेला परेका छैनन् । खोज अनुसन्धान तीव्र रूपमा भइरहेको छ ।
अहिलेसम्मको अनुसन्धानबाट पक्राउ परेका मध्ये केही लगानीकर्ता र केही भरिया भएको प्रहरी नायब निरीक्षक दीपक खडकाले बताए । सोक्टाबाट फलयक हुँदै सुन ल्याएको उनको भनाइ छ । पक्राउ परेकाहरूलाई सङ्गठित अपराध र भन्सार कानुन अनुसार कारबाही अगाडि बढाइएको छ । अनुसन्धान भइरहेकाले अहिले नै यथार्थ पुष्टि हुन बाँकी रहेको उनको भनाइ छ ।
