महानगरको कडा निर्देशन,विद्यालयमा स्वीकृति विना प्रवेश रोक

काठमाडौं । काठमाडौं महानगरपालिकाले महानगर भित्रका सबै विद्यालयहरुलाई परिपत्र गरेको छ । महानगरपालिका भित्रका विद्यालयमा स्वीकृतिबिना कसैलाई पनि प्रवेश नगराउन महानगरपालिले मंगलबार परिपत्र गरेको हो । विद्यालयले काठमाडौं महानगरपालिका, शिक्षा विभागको पूर्वस्वीकृति बेगर कसैलाई पनि विद्यालयमा प्रवेश नगराउन र कसैलाई आमन्त्रण गर्नैपर्ने भएमा विभागलाई पूर्वजानकारी गराएर मात्र प्रवेश गराउन निर्देशन दिइएको परिपत्रमा उल्लेख गरिएको छ ।

महानगरपालिकाको शिक्षा विभाग अनुसार विद्यालयहरुमा धार्मिक संगठन, विद्यार्थी संगठन, मानव अधिकार, बाल अधिकार, एनजीओ, आईएनजीओ, संस्था, गेष्ट लेक्चर आदिको नाममा विद्यार्थी तथा शिक्षक विद्यार्थीहरुसँग जबरजस्ती आर्थिक सहयोग माग गर्ने, शिक्षक विद्यार्थीलई अमर्यादित व्यवहार गर्ने, विद्यार्थीहरुलाई अवाञ्छित गतिविधिका लागि उक्साउने जस्ता क्रियाकलाप भइरहेको अभिभावक तथा विद्यालयको बारम्बार गुनासो आइरहेकोले पूर्व स्वीकृति बिना प्रवेश नगराउन परिपत्र गरिएको उल्लेख छ ।