लगानी नै बर्बाद भयो

झापा । सयपत्री फूलको खेतीमा लगानी गरेका किसान फूल नबिकेपछि समस्यामा परेका छन् । तिहार र छठपर्वमा नबिकेका फूल अब खेतमै कुहिने अवस्था पुगेको उनीहरुको गुनासो छ ।

बिर्तामोड नगरपालिका वडा नं ९ का दलबहादुर अधिकारीले यस वर्ष एक बिघा पाँच कठ्ठा जग्गामा सयपत्री फूलको खेती गरेका थिए । गत वर्ष १० कठ्ठामा मात्र फूलखेती गर्दा मनग्य आम्दानी भएपछि उत्साही बनेर यसपालि विस्तार गर्दा लगानी नै बर्बाद भएको सुनाए ।

भारतबाट आयातित फूलको माला र थुँगाले बजार जमाएपछि स्वदेशी सयपत्री फूलको उत्पादन बिक्री नभएको उनको भनाइ छ । अहिले उनको फूलखेतीमा दुई हजार पाँच सय केजी सयपत्री ढकमक्क फुलेको छ ।

कोलकाताबाट झिकाइएको बाह्रमासे सयपत्रीले यसपालि राम्रो उत्पादन दिएको उनको भनाइ छ । हालको बजारभाउअनुसार तिहारमा कम्तीमा रु पाँच लाखको फूल बिक्री हुने आशा गरेको उनले रु ७० हजारको मात्र फूल बिकेको बताए ।