सार्वजनिक निजी साझेदारी (पीपीपी) मोडलमा काम गर्न सरकारलाई अध्यक्ष ढकालको आह्वान

नवलपरासी । सरकारलाई विना लगानीको पार्टनर (साझेदार) बन्न उद्योग वाणिज्य महासंघका अध्यक्ष एंम आईएमई ग्रुपका अध्यक्ष चन्द्रप्रसाद ढकालले सरकारलाई आग्रह गरेका छन् । अध्यक्ष ढकालले पूर्वाधार क्षेत्रको विकास कार्यक्रममा सरकारले निजी क्षेत्रलाई सघाउनुपर्ने सोमबार पूर्वी नवलपुर गैंडाकोट–मौलाकाली केबलकारको उद्घाटन कार्यक्रममा बताएका हुन ।

गैंडाकोटदेखि मौलाकालीसम्मको दुरीमा रहेको केबलकारको लगानी १ अर्ब ५० करोड रुपैयाँ रहेको छ । केबलकारको टप स्टेसनमा सुविधासम्पन्न तीन तारे होटल समेतको लगानी २ अर्ब हाराहारी रहेको कम्पनीले बताएको छ । कतिपय परियोजनाहरुमा सार्वजनिक निजी साझेदारी (पीपीपी) मोडलमा काम गर्नुपर्ने भएपनि नसकिएको अवस्थामा सरकारले विना लगानीको पार्टनरशिपको रुपमा निजी क्षेत्रलाई सहयोग गर्नुपर्ने अध्यक्ष ढकालले बताए ।

उद्योग वाणिज्य महासंघका अध्यक्ष ढकालकै लगानी रहेको आईएमई ग्रुपले पूर्वी नवलपरासीको गैंडाकोटदेखि प्रसिद्ध धार्मिक स्थल मौलाकालीसम्म जाने केबलकार सोमबारदेखि औपचारिक रुपमै सञ्चालनमा ल्याएको हो। प्रधानमन्त्री पुष्पकमल दाहाल ‘प्रचण्ड’ले केबलकारको उद्घाटन गरेका थिए ।