- १ कार्तिक २०८३, आईतवार / Oct 18, 2026
काठमाडौं । सुदूर र मध्यपश्चिमका विभिन्न जिल्लामा भारी हिमपात भएको छ । उच्च क्षेत्रमा बुधबार रातिदेखि हिमपात सुरु भएको हो । हिउँ परेसँगै लेकाली क्षेत्रमा अत्याधिक चिसो बढेको छ भने हिमपातले जनजीवन कष्टकर बनेको छ ।
चिसोले विशेषगरी वृद्धवृद्धा, बालबालिका तथा गरिखाने वर्ग बढी प्रभावित भएका छन् । यता दार्चुलाका उच्च हिमाली क्षेत्र ब्यास, नौगाड, अपी हिमाल, न्वालपानी, दल्लेखलगायतका क्षेत्रमा हिमपात भएको मालिकार्जुन गाउँपालिका–२ का स्थानीय धनसिंह धामीले बताए ।
त्यस्तै, ब्यास गाउँपालिका–३ को सीना तुसरपानी, वडा–२ को राप्ला, दुम्लिङ, वडा–४ को सुन्सेरा, डोकट, वडा–५ को धौलाकोट, वडा–६ को हुतीलगायतका बस्तीहरूमा हिउँ परेको ब्यास गाउँपालिकाका स्थानीय पदमराज भट्टले बताए ।
कालापानी नजिकको क्षेत्र वडा–१ छाङरु र तिंकरमा भारी हिमपात भएको छ । हिउँले खानेपानीका पाइपहरू जाम भएका छन् भने शौचालय जानसमेत समस्या भएको छ । छाङरु र तिंकरका स्थानीय बासिन्दा मंसिर महिनामै दार्चुला सदरमुकाम खलंगा झरिसकेका छन् ।
तिंकर गाउँ हिउँदमा मानवविहीन हुने गरेको छ भने १२ किलोमिटर तल रहेको छाङरु गाउँमा नेपाल प्रहरी र सशस्त्र प्रहरी बाह्रै महिना बस्ने गरेको छ । अहिले चिसोका कारण ब्यास गाउँपालिका–१ छाङ्रुमा रहेका सुरक्षाकर्मीलाई पनि समस्या भएको जिल्ला प्रहरी कार्यालय दार्चुलाले जनाएको छ ।
