आगोमा ‘एक हजार करोड’ को क्षती, पाँच जनाकाे मृत्यु

भारत । सिरम इन्स्टिच्युट अफ इन्डिया (एसआईआई)मा लागेको आगोमा ‘एक हजार करोड’ भारतीय रुपैयाँ बराबरको क्षति भएको छ । कोरोनाविरुद्ध खोप उत्पादक कम्पनी सिरम इन्स्टिच्युट अफ इन्डियामा बिहीबार भीषण आगलागी हुँदा पाँच जनाको मृत्यु भएको थियो ।

कम्पनीका कार्यकारी अधिकृत (सीईओ) अदार पुनावालाले आगलागीबाट हजार करोडभन्दा बढीको क्षति भएको जानकारी दिए । तर कोरोनाविरुद्ध खोपको आपूर्तिमा भने यसले कुनै असर नपरेको बताए ।

यसैबीच सीईओ पुनावालाका पिता एवं कम्पनीका सीएमडी सायरस पुनावालाले आगालगीमा परी मृत्यु भएका पाँच जनाको परिवारलाई जनही २५ लाख रुपैयाँ सहयोग गर्ने घोषणा गरेका छन् । एसआईआईले अक्सफोर्ड विश्वविद्यालय र एस्ट्राजेनेकासँग मिलेर कोरोनाविरुद्ध कोभिसिल्ड खोप उत्पादन गरिरहेको छ । एजेन्सी