- २ कार्तिक २०८३, सोमबार / Oct 19, 2026
सिन्धुली । उद्योग, वाणिज्य तथा आपूर्ति मन्त्री दीलेन्द्रप्रसाद बडूले आत्मनिर्भर अर्थतन्त्र निर्माणमा सरकार सजग रहेको बताउनुभएको छ । उद्योग वाणिज्य सङ्घ सिन्धुलीले सिन्धुलीमाढीमा आयोजना गरेको छैटाैँ सिन्धुली महोत्सवको आज उद्घाटन गर्दै उहाँले मुलुकको अस्वस्थ अर्थतन्त्र सुधारका लागि सरकारले विशेष योजना अघि सारेको बताउनुभयो ।
उहाँले उद्योगहरुको उत्पादन बढाउनका लागि निजी क्षेत्रको सहकार्य आवश्यक रहेको बताउनुभयो । आर्थिक नीति र मौद्रिक नीतिमा सुधारका लागि क्षमता अनुसार काम गर्ने उहाँको भनाइ छ । चालु आवको बजेटमार्फत् राष्ट्रिय उत्पादन र उपभोग बढाउने नीति लिइएको र सोही अन्तर्गत नेपाली उत्पादन र उपभोग कार्यक्रम १० वर्षे अभियान सुरु भएको उहाँले जानकारी दिनुभयो । उहाँले यस वर्ष ३० वटा औद्योगिक ग्राम स्थापना हुने बताउनुभयो ।
ग्रामीण तहदेखि नै उद्योग स्थापना, रोजगारी सिर्जना गरी युवालाई उद्यमशीलतामा नजोड्ने हो भने अर्थतन्त्रमा सुधार आउन नसक्ने उहाँको भनाइ छ । “हातमा सीप हुनेहरुलाई उद्यमशिलताका रु पाँच लाखदेखि २५ लाखसम्म विउ पुँजी दिइनेछ”, उहाँले भन्नुभयो, “युवा र महिलालाई उद्यम सुरु गर्नका लागि सरकारले बिउ पँुजी दिने गरी विषेश कार्यक्रम सञ्चालनको तयारी भइरहेको छ”, उहाँले भन्नुभयो ।
उद्यमशिलता र उद्योगको स्थापना सरकारको मुख्य लक्ष्य रहेको उहाँको भनाइ छ । उद्योगहरु पूर्ण क्षमतामा सञ्चालन हुन नसकेको भन्दै यसका लागि सरकारले आवश्यक पहल गर्ने बताउनुभयो । जिल्लामा आयोजना हुने महोत्सवले यहाँको उत्पादनको प्रचार र बजारीकरणका लागि सहयोग पुग्ने विश्वास व्यक्त गर्नुभयो । महोत्सवबाट हुने आम्दानीले दमकल खरिद गर्ने योजनाको स्वागत गर्दै सङ्घीय सरकारले पनि सहयोग गर्ने प्रतिबद्धता जनाउनुभयो ।
‘कृषि उद्योग, पर्यटन र व्यवसायमा लगानी अभिवृद्धि गरौँ, समृृद्धि र सम्मुनत सिन्धुली निर्माणका लागि अघि बढौँ’ नाराका साथ सुरु भएको महोत्सव पुस १८ सम्म सञ्चालन हुनेछ । महोत्सव उद्घाटनमा प्रतिनिधिसभा सदस्य लेखनाथ दाहाल, श्याम घिमिरे, प्रदेशसभा सदस्य छेत्रबहादुर बम्जनले महोत्सवको सफलताको शुभकामना व्यक्त गर्नुभएको थियो ।
