- ११ कार्तिक २०८३, बुधबार / Oct 28, 2026
काठमाण्डौ । मंगलबारदेखि लगातार पानी पर्ने सम्भावना नरहेको जनाएको छ । देशका धेरै ठाउँ तीन दिनपछि घाम लागेको हो । पानी पार्ने प्रणाली कमजोर भएसंगै तत्काललाई ठूलो पानी पर्ने सम्भावना नरहेको जनाएको छ । मनसुनको समय भएकाले केही ठाउँमा हल्कादेखि मध्यम पानी पर्ने सम्भावना भने रहन्छ ।
पानी पर्न कम भएसँगै नदी तथा खोलामा जलसतह घट्न थालेको छ । यसअघि शुक्रवारदेखिको वर्षाले देशभरका नदी तथा खोलामा बाढी आएको थियो भने तराईका क्षेत्रमा डुबान समेत भएको थियो । यस्तै, पहिरोका कारण विभिन्न सडकमा क्षति पुगेको थियो ।
गएको वैशाख १ गतेदेखि अहिलेसम्म बाढी पहिरो तथा हुरीबतासका कारण ५२ जनाको ज्यान गएको छ । पहिरोमा परेर ३९, बाढीमा ११ तथा हुरीबतास र भारी वर्षाका कारण एकर एक जनाको ज्यान गएको राष्ट्रिय विपद् जोखिम न्यूनीकरण तथा व्यवस्थापन प्राधिकरणले जनाएको छ ।
मनसुनको न्यूनचापीय रेखा नेपाल नजिक हुँदा र भारतको बिहारको उत्तरपश्चिम तथा आसपासमा रहेको न्यूनचापीय प्रणालीको उच्च प्रभाव पर्दा गएको शुक्रवारदेखि आइतवारसम्म लगातार वर्षा भएको थियो । यो प्रणाली कमजोर बन्दा हिजो पनि मौसम बदली भए पनि धेरै ठाउँमा खासै पानी परेको थिएन ।
