कालोबजारी गर्ने पसललाई रु ४० लाख जरिवाना

काठमाडौं । बजार अनुगमनबाट रु चालिस लाख राजश्व संकलन भएको छ । भदौ १ देखि बजार अनुगमनका क्रममा अनैतिक क्रियाकलाप गर्ने पसललाई कारावाहीस्वरुप जरिवाना गर्दा १५ दिनको अवधिमा रु ४० लाख ३५ हजार राजश्व सङ्कलन गरेको वाणिज्य, आपूर्ति तथा उपभोक्ता हित संरक्षण विभागले जनाएको छ ।

६८ फर्मलाई कारवाही गर्दा उक्त रकम सङ्कलन भएको विभागका सूचना अधिकारी रवीन्द्र आचार्यले बताए । उपभोक्ता संरक्षण ऐन, २०७५ बमोजिम अनुचित व्यापारिक कारोवार गर्ने पसललाई जरिवाना गरिएको विभागले जनाएको छ । काठमाडौँ उपत्यकामा गरिएको निषेधाज्ञा र चाडपर्व नजिकिँदै गर्दा कालोबजारी वृद्धि हुने भएकाले विभागले दैनिक बजार अनुगमन गर्दै आएको छ ।