- १ भाद्र २०८३, सोमबार / Aug 17, 2026
१४ साउन २०७७ भक्तपुर । नेपाल क्रान्तिकारी किसान संघ स्थापनाको ५३ औं वर्षमा प्रवेश गरेको छ । कृषि क्षेत्रको विकासका लागि सरकारले अरबौं रुपैयाँ अनुदानको व्यवस्था गरे पनि वास्तविक पीडित किसानहरूले अनुदान पाउन नसकेकाे गुनासो किसानहरुले गरेका छन् ।
नेपाल क्रान्तिकारी किसान संघ जिल्ला समिति भक्तपुरले ५३ औं स्थापना दिवसको अवसरमा आयोजना गरेकाे कार्यक्रममा किसानहरुले यस्तो बताएका हुन । कार्यक्रमलाई सम्बोधन गर्दै भक्तपुर नगरपालिकाका प्रमुख सुनिल प्रजापतिले किसानहरूको श्रमको मूल्य नभएसम्म देशको विकास सम्भव नभएको विचार व्यक्त गरे । वर्तमान समयमा उत्पादनका साधनको यान्त्रीकरणको आवश्यकता औंल्याउदै प्रजापतिले संयुक्त राज्य अमेरिकाले ५० वर्षभन्दा बढी नाकाबन्दी गर्दा पनि स्वाभिमानपूर्वक बाँच्ने क्युवा र क्युवाली क्रान्तिबाट नेपालली किसानले पाठ सिक्नु जरुरी रहेको बताए ।
पैसा खर्च गरी निर्वाचित भएका सांसद तथा जनप्रतिनिधिले देश र जनताको हितमा भन्दा व्यक्तिगत स्वार्थ र देशको ढुकुटी सिध्याउनमै लागेको स्मरण गरे । नेमकिपाका अग्रज किसानहरूकै कारण भक्तपुरका किसानहरूको राजनैतिक र आर्थिक जीवनमा परिवर्तन सम्भव भएको बताए । भ्रष्टाचार र साम्राज्यवादविरुद्धको लडाइँलाई अझ अगाडि बढाउन निरन्तर संघर्षरत रहनेमा आशा व्यक्त गरे । कार्यक्रममा किसान संघले गरेका संघर्ष र योगदानहरूको चर्चा नयाँ पुस्तामाझ गरिनु आजको आवश्यकता भएको बागमती प्रदेशका सांसद सृजना सैंजुले बताइन् ।
फास्ट ट्रयाक र स्मार्ट सिटीको अवधारणा संघीयताविरोधी भएको र नेपालीहरूलाई सदियौंसम्म सामाजिक, आर्थिक र राजनैतिक रुपमा भारत निर्भर बनाउन ल्याएको उनले जिकिर गरिन् । वर्तमान नेकपा सरकार कम्युनिष्ट सरकार नभई किसानविरोधी सरकार भएको भन्दै उनले खोकना र बुंगमतीमा भइरहेको आन्दोलनप्रति ऐक्यबद्धता जनाइन् ।
नेक्राकिसंघ भक्तपुर जिल्ला समितिका अध्यक्ष गोविन्द दुवालले किसान संघ स्थापनाको उद्देश्यबारे प्रष्ट पार्दै राजनैतिक पार्टीको सिद्धान्तअनुसार कार्यकर्ताहरू परिचालित हुनुपर्नेमा जोड दिए । कार्यक्रममा नेमकिपा भक्तपुर जिल्ला अध्यक्ष न्हुछेभक्त फोंजु, नेक्राकिसंघ भक्तपुर जिल्ला समितिका उपाध्यक्ष केशवप्रसाद तिमिल्सिना, केन्द्रीय सदस्य विश्वनाथ प्रजापति र नेक्राकिसंघ भक्तपुर जिल्लाका सहसचिव नारायणभक्त न्हुम्हाफुकीलगायतले आ–आफ्नो धारणा राखेका थिए ।
