- २ कार्तिक २०८३, सोमबार / Oct 19, 2026
काठमाडौं । नेपाली चलचित्र ‘गाउँ आएको बाटो’ टोरन्टो इन्टरनेसनल फिल्म फेस्टिभल २०२३ मा छनोट भएको छ । नवीन सुब्बाको निर्देशनमा बनेको उक्त चलचित्र सेप्टेम्बर ७ देखि १७ सम्म चल्ने टोरन्टो फिल्म फेस्टिभलका लागि छनोट भएको हो ।
राई जातिको सामाजिक पृष्ठभूमिमा बनेको चलचित्रमा गाउँमा सडक आएपछि बाबुछोराको सम्बन्धमा आउने उतार चढावलाई नियाल्ने प्रयास गरिएको छ । यो चलचित्र सामुदायिक लगानीको अवधारणामा निर्माण भएको हो ।
भोजपुरको आमचोक, भोजपुर बजार, संखुवासभाको खाँदबारी र सुनसरीको धरानमा छायांकन गरिएको चलचित्र गाउँ आएको बाटोमा दयाहाङ राई, पशुपति राई, प्रसन राई, केशव राई, सुमित्रा राई, राज थापा, प्रेम सुब्बा लगायतको अभिनय रहेको छ ।
चलचित्र गाउँ आएको बाटो टोरन्टो फिल्म फेस्टिभलमा छनोट भएपछि निर्माण पक्षले एक विज्ञप्ति जारी गर्दै कलाकार, व्यवस्थापक, प्राविधिक लगायत चलचित्रमा आवद्ध सबैलाई धन्यवाद व्यक्त गरेको छ।
