धर्मेन्द्र बास्तोला प्रहरीको नियन्त्रणमा

दाङ । नवगठित नेकपा बहुमतका संयोजक धर्मेन्द्र बास्तोलालाई प्रहरीले नियन्त्रणमा लिएको छ । उनलाई बिहीबार बिहान ४ बजे दाङको भालुवाङबाट सोधपुछका लागि दाङ प्रहरीले नियन्त्रणमा लिएको बताएको छ ।

पूर्व–पश्चिम राजमार्ग हुँदै नेपालगञ्जतर्फ जाँदै गरेका बास्तोला सहित केही व्यक्तिलाई नियन्त्रणमा लिएको जिल्ला प्रहरी प्रमुख सुरेश काफ्लेले बताए । बास्तोलाको साथमा सहयोगीहरू राजेन्द्र साउद र अचल मोक्तान पनि छन् ।

बास्तोला संयोजक रहेको नेकपा बहुमतले केही दिन अघिमात्र स्थानीय तह निर्वाचन बहिष्कार गर्ने निर्णय गरेको थियो । उक्त पार्टीले निर्वाचन बहिष्कार गरेकाले शान्ति सुरक्षाको विषयलाई लिएर सोधपुछका लागि नियन्त्रणमा लिएको प्रहरी प्रमुख काफ्लेले बताए ।