- १५ श्रावण २०८३, शुक्रबार / Jul 31, 2026
टिकुलियाघाट । गौर र ईशनाथ नगरपालिका जोड्ने टिकुलियाघाटमा बन्दै गरेको पुल पप्पु कन्स्ट्रक्सनका लापरवाहीका कारण नबन्दा स्थानीयले सास्ती व्यहोर्नुपरेको छ ।
बाँसको पुल सहारा बनाएर आवतजावत गर्न स्थानीय बाध्य भएको बताए छन् । २६ असार ०७१ मा पप्पु कन्स्ट्रक्सनले निर्माण ठेक्का पाएको थियो । प्रधानमन्त्री सुशील कोइरालाले शिलान्यास गरेको सो पुल ६ वर्ष बित्दा पनि निर्माण सम्पन्न नभए स्थानीयले बताएका छन् ।
रौतहट सदरमुकाम गौर र ईशनाथ नगरपालिका जोड्ने सो पुल २५ असार ०७४ मै सम्पन्न हुनुपर्ने सम्झौतामा उल्यख छ तर, हालसम्म करिब ५० प्रतिशत पनि काम नभएको स्थानीयले बताएका छन् । सडक डिभिजन कार्यालय हेटौँडाबाट २० करोड ७२ लाखको लागतमा गौर–औरैया जोड्ने लालबकैया नदीमा दुई सय २५ मिटर लम्बाइ र ७.२ मिटर चौडाइ भएको पक्की पुल बनाउन बोलपत्र आह्वान गरेको थियो ।
समयमा काम नगर्ने ठेकेदारमाथि राज्यले कारबाही नगरेका कारण समस्या उत्पन्न भएको गौर नगरपालिकाका प्रमुख अजय गुप्ताले बताए । सम्झौताअनुसार समयमा काम गर्दैन, त्यस्ता ठेकेदारलाई कारबाही गर्नुपर्ने गुप्ताको भनाई छ । ठेकेदारमाथि राज्य किन उदार देखिएको छ ? जसका कारण पुल बन्न नसकेको तर्क स्थानीयको छ ।
