मनोनयन दर्ताको आज अन्तिम दिन

काठमाडौं । स्थानीय तहको निर्वाचनका लागि आज उम्मेदवारहरुले मनोनयन दर्ता गर्दै छन् । आइतबार मनोनयन दर्ता सुरु भए पनि आज अन्तिम दिन भएकाले धेरै जसोले आज उम्मेदवारी दर्ता गर्न लागेका हुन् ।

धेरैजसो ठाउँमा आज मनोनयन दर्ता गराउँन लागिएको दलहरुले बताएका छन् । ७५३ स्थानीय तहमा ३५ हजार २ सय २१ पदका लागि मनोनयन दर्ता हुदैछ ।

आइतबार १० हजार ५ सय २३ जनाको मात्र उम्मेदवारी परेको निर्वाचन आयोगले जनाएको छ । बिहान १० देखि साँझ ४ बजेसम्म मनोनयन दर्ताको समय तोकिएको आयोगको भनाइ छ ।

मनोनयन दर्ता भएपछि उम्मेदवारको सूची आजै साँझ प्रकाशन गरिने जनाएको छ । मनोनयन सकिएपछि सोमबार नै उम्मेदवारहरूको सूची प्रकाशन गरिने निर्वाचन आयोगका प्रवक्ता शालिकराम शर्मा पौडेलले कैलाश खबरलाई जानकारी दिए ।

सूची प्रकाशनपछि भने १३ वैशाखमा उम्मेदवारविरुद्ध दाबी–विरोध गर्ने निर्वाचन आयोगको कार्यतालिका छ । १४ र १५ वैशाखमा मनोनयन पत्र जाँच गर्ने र परेका उजुरीको जाँच बुझ गरी निर्णय गर्ने, १५ गते नै उम्मेदवारहरूको

नामावली प्रकाशन गर्ने, १६ वैशाखमा उम्मेदवारले नाम फिर्ता लिने र उम्मेदवारको अन्तिम नामावली प्रकाशन गरिने पौडेलले बताए । १७ वैशाखमा उम्मेदवारहरूलाई निर्वाचन चिह्न प्रदान गरिने निर्वाचन आयोगले जानकारी दिएछ ।