महेश बस्नेत झापा पुगेपछि गाडी तोडफोड

विर्तामोड । नेकपा एमालेका नेता महेश बस्नेत प्रमुख अतिथि बनेको झापाको अर्जुनधारा कार्यक्रममा तनाव सिर्जना भएको छ । बस्नेत झापा आएको थाहा पाएपछि व्यवसायी दुर्गा प्रसाईं त्यहाँ पुगेका थिए ।

त्यसपछि प्रसाईंका कार्यकर्ता र कोशी प्रदेश नामाङ्कनमा विरोध जनाइरहेकाहरुले कार्यक्रम बिथोल्न थाल्दा तनाव सिर्जना भएको हो । परिस्थिति बिग्रिन नदिन प्रहरीले विभिन्न ठाउँमा विरोधका लागि निस्किएकाहरुलाई रोकेको थियो । त्यसक्रममा लाठी चार्ज र दुई राउण्ड अश्रुग्याँस समेत प्रहार गर्नु परेको प्रहरीले जनाएको छ ।

प्रहरीसँग घम्साघम्सी भएपछि विरोधका लागि निस्किएकाहरु एमालेको कार्यक्रम स्थलसम्म पुगेर गाडी तोडफोड गरेको जिल्ला प्रहरी कार्यालय झापाका एसपी दुर्गाराज रेग्मीले बताए ।

इलाका प्रहरी कार्यालय, अनारमनीले तोडफोडमा संलग्न रहेको आशंकामा एक जना शंकास्पदलाई नियन्त्रणमा लिएको छ । यद्यपि, उनको संलग्नता पुष्टि भइनसकेको प्रहरी अधिकृतले बताए ।