राष्ट्रपति चयनमा दलहरूको प्राथमिकता, ‍राष्ट्रपति र प्रधानमन्त्री दुवै पदमा कांग्रेसको दावी

काठमाडौं । आमनिर्वाचनपछि राजनीतिक दलहरूले कार्यकारी प्रधानमन्त्रीभन्दा पनि संवैधानिक राष्ट्रपति चयनलाई मुख्य प्राथमिकता दिइरहेका छन् । प्रतिनिधिसभामा कुनै पनि गठबन्धनको स्पष्ट बहुमत नरहेका कारण आगामी दिनमा राष्ट्रपतिको भूमिका झनै बढ्ने उनीहरूको अनुमान छ ।

यसअघिका राष्ट्रप्रमुखले तरल राजनीतिक परिस्थितिमा आआफ्नो पूर्वपार्टीका पक्षमा खेलेको भूमिकाका कारण पनि दलहरूको चासो राष्ट्रपति छनोटमा केन्द्रित भएको हो ।राष्ट्रपति विद्यादेवी भण्डारीले दुई वा दुईभन्दा बढी दलको समर्थनमा प्रधानमन्त्री दाबीका लागि आह्वान गरिसकेको अवस्थामा सत्ता गठबन्धनभित्रका दलहरूले राष्ट्रपतिसहितका पदमा एकमुष्ट सहमति गर्नुपर्नेमा जोड दिइरहेका छन् ।

अहिलेको सत्ता गठबन्धन नयाँ सरकार बनाउन असफल भए मात्र संसद्को दोस्रो ठूलो दल एमाले अग्रसर हुने देखिन्छ । माओवादी र एकीकृत समाजवादीलाई गठबन्धनबाट बाहिर ल्याएर राष्ट्रपति पद आफूले लिने रणनीतिअनुरूपको पहल भने एमालेले गरिरहेको छ । संसद्को सबैभन्दा ठूलो दल कांग्रेसले राष्ट्रपति र प्रधानमन्त्री दुवै पद लिन खोजिरहेको छ ।

कांग्रेसमा संस्थापनइतर समूहका केही नेताले प्रधानमन्त्री अहिले माओवादीलाई दिएर राष्ट्रपति पद आफूले लिनुपर्नेमा जोड दिइरहेका छन् । गठबन्धनको अर्को दल एकीकृत समाजवादीले शक्ति बाँडफाँटका क्रममा राष्ट्रपति पदमा दाबी गर्ने संकेत गरिसकेको छ । कान्तिपुर दैनिकबाट…