रेल दुर्घटनामा परि भारतमा २ सय ८८ जनाको मृत्यु

भारत । भारतको ओडिसामा शुक्रवार बेलुका भएको दुर्घटनामा परि अहिलेसम्म २ सय ८८ जनाको ज्यान गएको छ । ओडिसामा रेल दुर्घटनामा परेकाहरूको उद्धार कार्य पूरा भएसंगै दुर्घटनामा परि मृत्यु हुनेको संख्या २ सय ८८ पुगेको हो । दुई वटा रेल एकआपसमा ठोक्किएका थिए । ती रेलमा झण्डै दुई हजार जना यात्रु थिए । प्रधानमन्त्री नरेन्द्र मोदीले घटनास्थलको भ्रमण समेत गर्नुभएका थिए ।

त्यसक्रममा घटनामा दोषी पाइएकालाई कडा सजाय दिइने प्रतिबद्धता जनाएका छन् । भारतमा विश्वको सबैभन्दा ठूलो रेल नेटवर्क रहेको छ । सरकारले पूर्वाधार सुधार गर्न अर्बौँ लगानी समेत गरिरहेको छ । तर भारतमा रेल दुर्घटनाहरू सामान्य जस्तै बनेका छन् । यसअघि भारतको सबैभन्दा खराब रेल दुर्घटना सन् १९८१ मा भएको थियो । त्यस बेला बिहार राज्यमा एउटा चक्रवातको समयमा यात्रुहरूको भिड भएको रेल ट्रयाकबाट नदीमा खस्दा कम्तीमा ८ सय जनाको ज्यान गएको थियो ।

आठ सय जनाभन्दा धेरै घाइते भएका छन् । दुर्घटनास्थलमा फसेका सबै यात्रु तथा घाइतेलाई त्यहाँबाट निकालिएको उद्धारकर्मीले बताएका छन् । उद्धारको काम सकेर दुर्घटनास्थलमा पुनर्निर्माणको काम सुरु भएको रेल मन्त्रालयले जनाएको छ ।