- ११ कार्तिक २०८३, बुधबार / Oct 28, 2026
३० साउन २०७७ सिन्धुपाल्चोक । जुगल गाउँपालिका– २ को लिदीमा गएको पहिरोले ३७ घर पुरिएको छ । शुक्रबार बिहान गएको पहिरोमा ३६ बढी बेपत्ता भएको स्थानीयले बताएका छन् भने प्रहरीले एकीन तथ्यांक सार्वजनिक गरेको छैन ।
जिल्ला प्रहरी कार्यालय सिन्धुपाल्चोकका डिएसपी माधवप्रसाद काफ्लेले प्रहरीहरु घटनास्थल पुग्दै गरेको कारण एकीन तथ्याङ्क आइ नसकेको जानकारी दिए । पहिरोमा ३६ बढी बेपत्ता भएको र ३७ घर पुरिएको स्थानीय पेशलाल दोङले बताए । पुरिएका घरमध्ये २७ घर पूर्ण रुपमा क्षति पुगेको छ ।
दुई जनाको शव भेटिएको छ भने ५ जनालाई उद्धार गरेर उपचारको लागि सदरमुकाम चौतारा पुर्याइएको गाउँपालिका अध्यक्ष होमनारायण श्रेष्ठले बताए । अहिले उद्धार र खोजीको काम चलिरहेको छ । प्रभावित क्षेत्रमा सभामुख अग्नि सापकोटासहितको टोली पनि पुगेको छ । यस्तै जिल्ला प्रहरी कार्यालय सिन्धुपाल्चोकबाट पनि प्रहरीको टोली घटनास्थल गइरहेको छ ।
