- २२ श्रावण २०८३, शुक्रबार / Aug 7, 2026
१४ साउन २०७७ काठमाडौं । विदेशमा अहिले सम्म ४ सय ५६ नेपालीले ज्यान गुमाएको तथ्याङ्क सार्वजनिक भएको छ । यी मध्य कोरोनाबाट कति जनाको ज्यान गयो भन्ने खुलाइएको छैन। कतिपय आत्महत्या र कतिपय अन्य कारणबाट नेपालीको ज्यान गएको परराष्ट्र मन्त्रालयको कन्सुलर विभागले जनाएको छ ।
सामान्य कामदारका रूपमा विदेश गएकाहरू धेरै रहेको विभागका निर्देशक जंगबहादुर गुरुङले बताए । कोरोना महामारीसँगै विदेशमा आत्महत्या गर्ने नेपालीको संख्या धेरै रहेको उनको भनाई छ । लकडाउन अवधिमा विदेशमा ज्यान गुमाउने नेपालीको संख्या बढेको छ । सबैभन्दा बढी साउदी अरबमा १ सय ५८ नेपालीले ज्यान गुमाएका छन् । यूएईमा ८०, कतारमा ७५, मलेसियामा ६६, कुवेतमा २२, जेद्दाहमा १३, बहराइनमा १०, दक्षिण कोरियामा ८ र अन्य मुलुकमा १४ जनाले ज्यान गुमाएको तथ्याङ्क छ ।
यी मध्य ९८ नेपालीको शव नेपाल ल्याइएको छ । साउदीबाट ५३, कतारबाट २३, कुवेतबाट १०, बहराइनबाट ७, जेद्दाहबाट २, यूएई, मलेसिया र अन्य राष्ट्रबाट १/१ जनाको शव नेपाल ल्याइएको हो । १ सय ६४ जनाको शव भने विदेशमै दाहसंस्कार गर्ने विभागले जनाएको छ । यूएईमा ५८, साउदीमा ३७, कतारमा २५, कुवेतमा १०, मलेसियामा ८, दक्षिण केरियामा ५, बहराइनमा ३, जेद्दाहमा ३ र अन्य मुलुकमा १५ जना नेपालीको शव दाहसंस्कार गर्ने परिवारको मञ्जुरीनामा तथ्यांकमा उल्लेख छ ।
यता परिवारको नेपाल ल्याईदिने आग्रहमा ८५ जनाको शव स्वदेश ल्याउन थालिएको छ । साउदीबाट ३९, यूएईबाट १३, मलेसियाबाट १२, कतारबाट १०, दक्षिण कोरियाबाट ३, कुवेतबाट २, जेद्दाहबाट १ र अन्य मुलुकबाट पाँच नेपालीको शव स्वदेश फिर्ता ल्याउन लागिएको विभागले जनाएको छ।
