शरणार्थी शिविरलाई लक्षित गर्दै इजरायली सेनाकाे आक्रमण, ९ प्यालेस्टाइनीको मृत्यु

काठमाडौं । इजरायली आक्रमणबाट ९ जना प्यालेस्टाइनीको मृत्यु भएको छ। इजरायलले वेस्टब्यांक क्षेत्रमा गरेको आक्रमणमा ९ जना प्यालेस्टाइनीको मृत्यु भएको हो । झण्डै १४ हजार प्यालेस्टाइनी सर्वसाधारणले आश्रय लिइरहेको जेनिन शिविरमा आतंकवादीहरु बसेको भन्दै इजरायले निर्णायक कारबाही थालेपछि ९ जनाको मृत्यु भएको विभिन्न सञ्चारमाध्यमले जनाएका छन् ।

शिविरमा हवाई आक्रमण भएपछि तीन हजार भन्दा बढी प्यालेस्टाइनी शिविर छोडेर भागेका छन्। शिविर छोडेर जाने सबैजसो सर्वसाधारण रहेको जनाएको छ । प्यालेस्टाइनले इजरायली सेनाले शिविरमा हत्याकाण्ड चलाएको दाबी गरेको छ। इजरायली सेनाको आक्रमणपछि सोमबार दिनभर र रातभरजसो जेनिन क्षेत्रभर गोली हानाहानका घटना भएका छन्।

वेस्ट ब्यांकको जेनिनमा रहेको शरणार्थी शिविरलाई लक्षित गर्दै इजरायली सेनाले हवाई तथा स्थल कारबाही जारी राखेको छ। आक्रमणमा एक सयभन्दा बढी घाइते भएको र कयौँको अवस्था गम्भीर रहेको बीबीसीले जनाएको छ।