अज्ञात समूहले लगायो आगो

सोलुखुम्बु । मिड सोलु हाइड्रोपावर सोलुखुम्बुमा प्रयोग भएको जेसीबी मेसिनमा अज्ञात समूहले आगजनी गरेको छ । मिड सोलु हाइड्रोपावरको कार्यक्षेत्रमा पार्किङ गरिराखेको प्रदेश ३–०१००३ प्र ७०४८ नम्बरको मेसिनमाथि अज्ञात समूहले आगजनी गरेकोे हो ।

जिल्ला प्रहरी कार्यालय सोलुखुम्बुका अनुसार गत मंगलबार हाइड्रोपावरले कार्यक्षेत्रमै पार्किङ गरि राखेर अपरेटर दशैँ मनाउन घर गएको समयमा मेसिनमा आगजनी भएको हो । करिब सात महिना देखि हाइड्रोपावरले प्रयोग गर्दै आएको जेसीबी कुन दिन आगजनी भएको हो भन्ने यकिन नभएको र आइतबार मात्रै प्रहरीलाई जानकारी प्राप्त भएको सोलु प्रहरीले जनाएको छ ।

यस घटनाको विषयमा अनुसन्धान भइरहेको जिल्ला प्रहरी कार्यालय सोलुखुम्बुले जनाएको छ । सोलु दुधकुण्ड नगरपालिका ६ का दिलकुमार बस्नेतको उक्त जेसिबी मेसिन संगीता कन्स्ट्रक्सन काठमाण्डौको नाममा रहेको खुल्न आएको छ । आगजनीबाट पूर्ण रुपमा क्षतिग्रस्त बनेको सो मेसिनको विषयमा अनुसन्धान भइरहेको जिल्ला प्रहरी कार्यालय सोलुखुम्बुले जनाएको छ ।