अब तीनजनासम्म बच्चा जन्माउन दिइने

चीन । काम गर्ने उमेरको जनसंख्यामा एकदमै छिटो व्यापक गिरावट आएपछि चीनमा दम्पत्तिहरुलाई तीनजनासम्म बच्चा जन्माउन दिइने भएको छ । चीनका राष्ट्रपतिले अध्यक्षता गरेको पार्टीको पोलिटब्यूरो बैठकले उक्त प्रस्ताव पारित गरेको हो ।

चीनको जनगणनाको तथ्यांकले काम गर्ने उमेरको जनसंख्यामा गिरावट आएको र ६५ बर्षमाथिको जनसंख्यामा बृद्धि भएको देखाएको थियो । अर्थतन्त्र र समाजमा जनसंख्याको सन्तुलनले भार थपेपछि र चीनको महत्वांकाक्षी आर्थिक लक्ष्यमा जोखिम उत्पन्न भएपछि तीनजनासम्म बच्चा जन्माउन पाउने नीति ल्याइएको हो ।

चीनमा त्यहाँको कम्युनिष्ट पार्टीले जनसंख्या बृद्धिदर नियन्त्रणका लागि भन्दै सन् १९८० देखि एकजनाभन्दा बढी बच्चा जन्माउन नपाउने नियम लागु गर्दै आएको छ । सन् १०७९ मा ल्याइएको एकबच्चा नीति अन्तरगत परिवार नियोजनको कानून नमान्नेहरुलाई कारवाही गरिदै आएको थियो । कतिपय परिवारले जरिवाना तिर्नुपरेको थियो भने कानून नमान्ने कैयनले जागिर गुमाएका थिए ।

कतिपय मामलामा आमाहरुलाई गर्भपतनका लागि बाध्य पारिएको थियो । एक बच्चा नीतिले आर्थिक बृद्धिदरमा असर गरेको भन्दै मापदण्डहरु सन् २०१५ मा केही खुकुलो बनाइएको थियो । सन् २०१५ देखि चीनमा एक दम्पत्तिले दुईजनासम्म बच्चा जन्माउन सक्ने नियम ल्याइएको थियो । यो नीतिले पनि चीनको जन्मदर बढाउन नसकेपछि अहिले नयाँ नीति ल्याइएको हो ।

सन् २०२० को जनगणना अनुशार गतबर्ष चीनमा १ करोड २० लाख बच्चाहरु जन्मिएका थिए । सन् २०१९ मा चीनमा १ करोड ४६ लाख बच्चाहरु जन्मिएका थिए । सन् २०१९ को तुलनामा जन्मदर १८ प्रतिशतले गिरावट आएको थियो । तर ६५ बर्षमाथिकाहरुको जनसंख्या भने १० बर्ष अगाडिको तुलनामा १८ दशमलव ७ प्रतिशतले बृद्धि भएको छ । एजेन्सी