- १८ असार २०८३, बिहीबार / Jul 2, 2026
काठमाडौं । एमाले सचिव तथा पूर्वमन्त्री टोपबहादुर रायमाझी अझै फरार रहेको भन्दै प्रहरीले उनलाई पक्रन देशभर परिपत्र गरेको छ । जिल्ला प्रहरी परिसर काठमाडौंले परिपत्र गरेको हो ।
पक्राउका लागि केन्द्रीय अनुसन्धान ब्युरो (सिआइबी)लगायतका निकाय परिचालन गरिएको छ । पक्राउ पुर्जी जारी हुदाका वखत रायमाझी गृहजिल्ला अर्घाखाँचीको एक कार्यक्रममा सभामुख देवराज घिमिरेसँगै सहभागि भएका थिए ।
प्रहरीलाई सघाउने भन्दै काठमाडौं हिँडेका राइमाझी छोरा सन्दीप पक्राउ परेपछि बिहीबार बिहानदेखि फरार रहेको प्रहरीले बताएको छ । सोही मुद्दाका कारण नेपाल प्रहरीका आइजिपी वसन्तबहादुर कुँवरको अमेरिका भ्रमण रद्द गरिएको छ ।
अमेरिकी सरकारले गर्ने ‘लिडरसिप एक्सचेन्ज’ सम्बन्धी कार्यक्रमको निमन्त्रणमा उनी सोमबार त्यसतर्फ जाने कार्यक्रम तय भएको थियो । भुटानी शरणार्थीसम्बन्धी ठगी मुद्दामा उच्चपदस्थमाथि अनुसन्धान अघि बढेपछि आइजिपी कुँवरले भ्रमण रद्द गरेको स्रोतको दावी छ ।
आइजिपी कुँवरको भ्रमण रद्द भएको प्रहरी सहप्रवक्ता एसएसपी दीपेन्द्र जिसीले बताए । मन्त्रिपरिषद्ले भ्रमण स्वीकृत गरे पनि सरकारकै सल्लाहमा भ्रमण रद्द गरेका हुन् ।
