- १८ असार २०८३, बिहीबार / Jul 2, 2026
काठमाडौं । सोमबारको प्रतिनिधिसभा बैठकमा संसद भित्रै सांसद अर्धनग्न भएको दृश्य देखियो । भ्रष्टाचारको विषयमा बोल्न नपाएको भन्दै कपडा खोलेर संसदीय मर्यादा उल्लंघन गर्ने सांसद हुन सर्लाही–४ बाट निर्वाचित स्वतन्त्र सांसद अमरेशकुमार सिंह ।
बैठक सुरु हुनेबित्तिकै सभामुख देवराज घिमिरेले कार्यव्यवस्था परामर्श समिति बैठकको निर्णयअनुसार विशेष र आकस्मिक समय कटौती भएको जानकारी गराए ।
सिंह र नेपाल मजदुर किसान पार्टीका सांसद प्रेम सुवालले नक्कली भुटानी शरणार्थीको विषयमा ठूला नेताहरूको मिलेमतो के हो भनेर आकस्मिक समयमा बोल्न पाउनुपर्ने माग राखे ।
सभामुखले समय नदिएपछि उठेर विरोध जनाए । सभामुख घिमिरेले बैठकको कारबाही अघि बढाउन थालेपछि सिंहले कोट, सर्ट र गन्जी खोलेर विरोधमा उत्रिए ।
सिंहले लुगा खोलेर ‘अमर्यादित हर्कत’ गरेपछि कांग्रेस, एमाले, रास्वपा र राप्रपाका सांसदले उठेर विरोध जनाएका थिए । अर्धनग्न अवस्थामै बोल्न पाउनुपर्ने अडान सिंहको कायमै थियो ।
संसद्मै कपडा खोल्नुले प्रतिनिधिसभा नियमावलीको नियम २१ को ‘घ’ आकर्षित हुने सभामुखले सिंहलाई सम्झाए ।
‘संसद्मा अशिष्ट, अश्लील, अपमानजनक, आपत्तिजनक शब्द वा सार्वजनिक शिष्टाचार वा नैतिकताको प्रतिकूल हुने गरी बोल्न र कुनै व्यक्ति, जाति, धर्म, भाषा वा लिंगलाई होच्याउने वा अरू कुनै किसिमले असर पर्ने गरी बोल्न र असंसदीय शब्द प्रयोग गर्न नहुने’ व्यवस्था छ ।
नियमावलीको व्यवस्था उल्लंघन गरेको भन्दै सभामुख घिमिरेले अन्यथा कारबाही हुने चेतावनी दिए । बैठक सुरु भएपछि सिंह बाहिरिए ।
संसदीय मर्यादाविपरीत बैठकमा अर्धनग्न हुने अधिकार छ कि छैन ? सर्वत्र चाँसोको विषय बनेको छ ।
