कर्णालीमा हिमपातले जनजीवन कष्टकर

सुर्खेत । ह्वात्तै बढेको चिसोका कारण कर्णाली प्रदेशका सबै जिल्लाको जनजीवन प्रभावित भएको छ। जनजीवन कष्टकर मात्रै भएन स्थानीयलाई घरबाहिरको काम गर्नसमेत सहज भएको छैन। बिहीबार कर्णाली प्रदेशको हुम्ला, मुगु, जुम्ला र डोल्पालगायतका उच्च भूभागमा भारी हिमपात भएको छ।

कालिकोट, दैलेख, जाजरकोट, सल्यान र सुर्खेतमा वर्षासँगै चिसो बढेको छ। हुम्लाका स्थानीयवासीलाई घर बाहिर निस्कन कठिन भएको छ। चिसोका कारण रुघाखोकीको संक्रमण बढ्दै गएको हुम्लाका प्रमुख जिल्ला अधिकारी विनिता भट्टराईले जनाएकी छन्।

तापक्रम माइनस २.६ डिग्री सेल्सियसमा झरेको छ । मौसमी पूर्वसूचना दिन सुर्खेतको रातानाङ्लामा स्थापना भएको नेपालकै पहिलो मौसमी राडरका अनुसार शनिबारसम्म लगातार कर्णालीका उच्च हिमाली क्षेत्रमा हिमपात र बेंसीमा वर्षाको सम्भावना छ।