- ३ भाद्र २०८३, बुधबार / Aug 19, 2026
काठमाडौं । नेपाली कांग्रेसको १४औँ महाधिवेशनबाट नवनिर्वाचित केन्द्रीय कार्यसमितिको बैठक आज बस्दैछ । दिउँसो १ बजे कांग्रेस केन्द्रीय कार्यालय सानेपामा बैठक बस्न लागेको हो ।
बिहान ११ बजेदेखि निर्वाचित पदाधिकारी एवं सदस्यलाई ‘निर्वाचित भएको प्रमाणपत्र’ वितरण गरेलगत्तै केन्द्रीय समिति बैठक बस्ने नेपाली कांग्रेसले जनाएको छ ।
गत मंसिर २४ देखि २८ गतेसम्म सम्पन्न महाधिवेशनअन्तर्गत भएको निर्वाचनबाट केन्द्रीय कार्यसमितिका १३४ पदाधिकारी र सदस्य निर्वाचित भएका थिए । यसबाहेक नयाँ विधानअनुसार सभापतिले ३३ जना मनोनित गर्न बाँकी रहेको कार्यालयका सचिव केशव रिजालले बताए।
बैठकमा सभापति देउवाले सम्बोधन गर्ने र सबैलाई धन्यवाद दिने कार्यक्रम रहेको जनाइएको छ । यसैबीच निर्वाचन आयोगमा दल दर्ताका लागि निर्णय गर्नेलगायतको पनि कार्यसूची रहेको छ ।
कांग्रेसले बैठकको निर्णयसहित शनिबार आयोगमा राष्ट्रिय सभा सदस्य निर्वाचन प्रयोजनका लागि दल दर्ताको निवेदन दिने तयारी थालेको छ ।
