काठमाडौँ रात्रिकालीन सार्वजनिक बस सेवा

काठमाडौँ, ३० चैत्र । काठमाडौँ महानगरपालिकाले भोलि वैशाख १ गतेदेखि रात्रिकालीन सार्वजनिक बस सेवा सञ्चालन गर्ने भएको छ। महानगरपालिकाले साझा यातायातसँगको सहकार्यमा राति ८ बजेदेखि ११ बजेसम्म बस सञ्चालन गर्ने तयारी गरेको हो।

प्रारम्भिक चरणमा दुईवटा मुख्य रुटमा बस सञ्चालन हुनेछन्। पहिलो रुट ललितपुरको लगनखेलबाट सुरु भई पाटन अस्पताल, अल्का अस्पताल, नर्भिक, प्रसूति गृह, ट्रमा सेन्टर, वीर अस्पताल, कान्ति अस्पताल, टिचिङ अस्पताल, गंगालाल हृदय केन्द्र हुँदै बूढानीलकण्ठसम्म पुग्नेछ।

त्यसैगरी दोस्रो रुट थानकोटबाट सुरु भई सतुंगल, कलंकी, कालीमाटी, त्रिपुरेश्वर, थापाथली, माइतीघर मण्डला, बानेश्वर, मीनभवन, तीनकुने हुँदै अन्तर्राष्ट्रिय विमानस्थलसम्म सञ्चालन हुनेछ।

दुवै रुटमा चार वटा विद्युतीय बस सञ्चालन हुनेछन्। बसहरू प्रत्येक २० मिनेटको अन्तरालमा उपलब्ध हुनेछन्। यात्रुको सुरक्षाका लागि बसमा सीसीटीभी क्यामेरा जडान गरिनेछ भने नगर प्रहरीको निगरानी पनि रहने महानगरपालिकाले जनाएको छ।