- १८ श्रावण २०८३, सोमबार / Aug 3, 2026
काठमाण्डौ, ३० चैत्र । सरकारले हप्ताको दुई दिन सार्वजनिक बिदा दिने निर्णय लागू गरेपछि स्वास्थ्य सेवा प्रभावित हुनसक्ने सम्भावनालाई ध्यानमा राख्दै स्वास्थ्य तथा जनसंख्या मन्त्रालयले स्वास्थ्य सेवा निरन्तर सञ्चालन गर्न आग्रह गरेको छ।
मन्त्रालयद्वारा जारी विज्ञप्तिमा बिरामीलाई कुनै असहजता नहोस् भन्ने उद्देश्यले बिदाका दिनमा पनि स्वास्थ्य सेवा सञ्चालन गर्नुपर्ने उल्लेख गरिएको छ। मन्त्रालयको अनुरोधपछि धेरै अस्पतालहरूले बिदाका दिनमा पनि बहिरङ्ग (ओपिडी) सेवा सञ्चालन गरिरहेको भन्दै मन्त्रालयले धन्यवादसमेत व्यक्त गरेको छ।
विज्ञप्तिमा चिकित्सक, स्वास्थ्यकर्मी तथा सेवा प्रदायक संस्थाबाट प्राप्त गुनासोप्रति मन्त्रालय जानकार रहेको उल्लेख गर्दै ती समस्याको समाधानका लागि मन्त्रालय सकारात्मक र प्रतिबद्ध रहेको जनाएको छ।
नागरिकको स्वास्थ्यजस्तो संवेदनशील विषयलाई ध्यानमा राख्दै सेवा निरन्तरता दिनु सबै सरोकारवालाको प्रमुख दायित्व भएको मन्त्रालयले स्पष्ट पारेको छ।
साथै सबै सरोकारवालासँग समन्वय गरी स्वास्थ्य सेवा प्रवाहलाई व्यवस्थित, सन्तुलित तथा दिगो बनाउने उद्देश्यले आवश्यक कार्यविधि तयार पार्ने प्रक्रिया अघि बढाइएको जानकारी दिइएको छ।
