- २६ भाद्र २०८३, शुक्रबार / Sep 11, 2026
श्याम नेपाली ‘हिमाल’, मोरङ । ‘हुनेले दिएर जाऔं, नहुनेले लिएर’ भन्ने नाराका साथ केराबारी गाउँपालिकाको भवनअगाडि दैनिक ज्याला मजदुरी गरेर खाने मानिसका लागि निशुल्क खाध्यन्नको व्यवस्था गरिएको छ ।
बिहान ९ देखि १० बजेसम्म खुल्ला गरिएको चामल, दाल, तेल, नुन र सोयाबिनका पोका वितरण गरिन्छ । कोरोना महामारी र लकडाउनले दैनिक ज्याला-मजदुरी गरेर खानुपर्नेलाई एक छाक टार्न यसले सहज मात्रै होइन राहत पुगेको छ । थोरै भए पनि राहत होस् भनेर नै नेपाल तरुण दल, केराघारीले ुफुड बैंकु सुरू गरेको हो ।
नहुनेलाई निस्शुल्क बाँड्ने उद्देश्यले यो अभियान सुरू गरिएको तरुण दल मोरङका अध्यक्ष पप्पु साहले बताए । रोगले भन्दा भोकले मानिस नमरोस भन्ने उदेश्यका साथ थोरै भएपनि राहत मिलोस भनेर यस्तो गरिएको उनको भनाइ छ । अहिले सम्म दुई सयबढीले आफूलाई चाहिएका सामग्री लगेको भन्दै फुड बैंकले २ किलो चामल, १ प्याकेट नुन, आधा लिटर तेल, आधा किलो सोयाबिन र आधा किलो दाल वितरण गरिदै आएको बताए ।
राहत वितरण र व्यवस्थापनमा तरूणदलका सदस्य पालैपालो खटिने गरेका छन् । फुड बैंकमा ५० हजार रूपैयाँभन्दा बढीको आर्थिक सहयोग पनि जुटेको तथ्याङ्क दलसंग छ । यस्तो काम त वडा सरकारले संचालन गर्नु पर्ने तर्क तरूण सदस्यको छ । वडाको सहयोगमा यो अभियान चलाउन सके धेरैलाई राहत हुने उनीहरूको भनाइ छ।
