चिनियाँ विशेष दूत नेपाल आउदै

काठमाडौं । भारतीय पक्षको निरन्तर नेपाल वाच पछि चिनियाँ पक्षले पनि विशेष दूत नेपाल पठाउँदै छन्। चिनियाँ रक्षामन्त्री वेई फेङहे राष्ट्रपति सी चिनफिङको सन्देश लिएर आइतबार काठमाडौं आउन लागेका हुन । विशेष जहाजबाट उनी नेपाल आउन लागेको परराष्ट्र मन्त्रालयले जनाएको छ ।

चिनियाँ राजदूतावासले रक्षामन्त्री फेङ्हेको नेपाल भ्रमणको तयारी छुट्टै गरिरहेको छ।भारतीय गुप्तचर प्रमुख सामान्तकुमार गोयल र सेनाध्यक्ष मनोजमुकुन्द नरवणेको भ्रमणलगत्तै चिनियाँ विशेष दुतको नेपाल भ्रमण विशेष महत्वकासाथ हेरिएको छ ।

गत वर्ष चीन भ्रमणमा गएका बेला उपप्रधानमन्त्री ईश्वर पोख्रेलले तत्कालीन रक्षामन्त्रीको हैसियतमा चिनियाँ समकक्षी फेङ्हेलाई नेपाल भ्रमणको निम्तो दिएका थिए । झट्ट हेर्दा नियमितजस्तो देखिए पनि अन्तर्राष्ट्रिय उडान सुचारु नभएको र नेपालमा कोरोना भाइरस संक्रमण बढिरहेका बेला हुन लागेको चिनियाँ रक्षामन्त्रीको भ्रमण अर्थपूर्ण हुने छ।

नेकपा गम्भीर संकटमा परेका बेला फेङ्हेको नेपाल भ्रमण रक्षा मामिलाभन्दा पनि राजनीतिक विषयमा केन्द्रित हुने विज्ञहरुको भनाई छ । राष्ट्रपति विद्यादेवी भण्डारी र प्रधानमन्त्री केपी शर्मा ओलीसँग विशेष भेटवार्ता गर्ने बताईएको छ । यता चिनियाँ राजदूत होउ यान्छीले नेकपा नेतृत्वसंगको भेटलाई तीब्र पारेकी छन् ।