- २९ भाद्र २०८३, सोमबार / Sep 14, 2026
काठमाडौं । मंसिर ४ को निर्वाचनका लागि मतदाता रिझाउन दल र उम्मेदवारलाई चुनावको चटारो छ । यहीबीचमा प्रमुख दलहरू भने मुद्दा, कार्यशैली, विधि र पद्धति जस्ता विषयमा विचलित देखिदै गएका छन् ।
जनताको असन्तुष्टिप्रति बेखबर छैनन् तर सत्ता मात्रै केन्द्रमा हुँदा आफ्नो कार्यशैली सुधार्ने र जनहितमा काम गर्न ध्यानै देखिन्न । त्यही कारण दलहरूले चुनावै बेला एकपछि अर्को चुनौती चिर्नुपर्ने देखिन्छ ।
२०७४ को चुनावबाट पहिलो दल बनेर सत्ताको भागडोर सम्हालेको नेकपा एमालेमाथि आरोपका चाङ लागेपछि अब के हुन्छ ग्यारेन्टी छैन । संविधान मिचेको, २ पटक प्रतिनिधि सभा विघटन गरेको र नेतृत्व निरंकुश भएको अपजस खेपिरहेको छ ।
दुईतिहाईको सरकार टिकाउन नसकेको, सरकारमा छँदा भ्रष्ट्राचार र बेथितिका काण्डै काण्डमा मुछिएको आरोप छ । सत्ता गठबन्धनको चेपुवामा परेको एमालेको पार्टी फुटले धरातल खस्किदै गएको स्थानीय चुनावकै नतिजाले देखाएको छ ।
