जनताको लागि सेवक भई समग्र काठमाडौँ विकास आफ्नो प्राथमितामा रहनेछ : उपप्रमुख डङ्गोल

काठमाडाैं । काठमाडौँ महानगरपालिकाको नवनिर्वाचित उपप्रमुख सुनिता डङ्गोलले रचनात्मकरुपमा महानगर विकासमा जुट्ने बताएकी छन् । राष्ट्रियसभा गृहमा आयोजना भएको निर्वाचन परिणाम घोषणा तथा बधाई ज्ञापन कार्यक्रममा उपप्रमुख डङ्गोलले जनताले युवा पुस्तालाई गरेको विश्वासमा कमी आउन नदिने बताएकी हुन् ।

उक्त कार्यक्रममा बाेल्दै  नवनिर्वाचित उपमेयर डंगाेलले महानगरकाे प्रमुखमा स्वतन्त्र उम्मेदवार बालेन्द्र साह निर्वाचित भएकाे र महानगरपालिकाकाे  ३२ वटै वडामा नेपाली कांग्रेस, नेकपा (एमाले) र नेकपा (एकीकृत समाजवादी)का तर्फबाट जनप्रतिनिधिहरू विजय भएकाे बताउँदै सबै जनप्रतिनिधिहरूसंग सहकार्य गरेर महानगरकाे क्रमिक  विकासमा लाग्ने बताइन् ।

जनताले महानगर बनाउँन विश्वास दिएकाले जनताकाे मतकाे कदर गर्ने बताइन् । पाँच वर्षमा जनताको लागि सेवक भई समग्र काठमाडौँ विकास आफ्नो प्राथमितामा रहेको उल्लेखसमेत गरिन् । विगतमा समेत आफू सामाजिक काममै सक्रिय रहेकाले आगामी दिनमा नगरवासीले थपिदिएको जिम्मेवारी इमान्दारिताका साथ पूरागर्ने प्रतिबद्धता व्यक्त  गरिन् ।