जाजरकोटमा ९ को शव भेटियो, प्रचण्डसहित ६ जना अझै बेपत्ता

२८ असार २०७७ जाजरकोट । पहिरोमा परी बेपत्ता भएका ९ जनाको शव भेटिएको छ । ६ जना अझै बेपत्ता रहेको जाजरकोटका डीएसपी किशोर श्रेष्ठले बताए । बेपत्तामध्ये ७ जनाको शव शुक्रबार भेटिएको थियो भने शनिबार थप दुई जनाको भेटिएको हो ।

बारेकोट गाउँपालिका–४, सार्कीगाउँका कल्लु सार्की र उनका ६ वर्षका छोरा सुवास सार्कीको शव शनिवार फेला परेको डीएसपी श्रेष्ठले बताए । बारेकोट गाउँपालिका–४ का ५२ वर्षीय गोपाल सार्की, उनको ११ वर्षका छोरा अर्जुन सार्की र १४ वर्षीया छोरी तिर्खा सार्की र कलुको घरमा पाहुन आएका कुशे गाउँपालिका–९ का २० वर्षीया डिल्ली सार्की, १४ वर्षीकी गौरी, १६ वर्षकी कविता र १८ वर्षका वीरेन्द्र सार्कीको शव शुक्रवार भेटिएको थियो ।

बिहीबार रातिको पहिरोले घर बगाउँदा १२ जना बेपत्ता भएका थिए । स्थानीय खोलामा बगेका बारेकोट– ६ धुमाका २० वर्षीय शान्तबहादुर चलाउने र १० वर्षीय प्रचण्ड चलाउने अझै भेटिएका छैनन् । जुनिचाँदे गाउँपालिका–१ का डिल्ली चुनारा पनि बेपत्ता छन् । उनीहरूको खोजी भइरहेको जिल्ला प्रहरी कार्यालयले जनाएको छ ।